國際泳聯改例因為伏明霞？

呢排阿史睇奧運真係睇到入晒迷，好似女子高台跳水咁，年僅14歲嘅全紅嬋以近乎完美嘅表現奪得冠軍，仲要响過程中拎咗三次滿分10分，所以唔少人都話佢係繼伏明霞之後另一位跳水天才運動員。

好多人見到全紅嬋嘅表現就諗起29年前嘅伏明霞，因為佢兩個都係响14歲左右年紀就拎到奧運金牌。當年伏明霞代表國家隊參加1992年巴塞羅那奧運會，當時未夠14歲嘅佢一鳴驚人，成為當時亞洲最年輕嘅奧運金牌得主。之後佢响四年後嘅亞特蘭大奧運會，就再响十米高台同三米彈板拎多兩面金牌，成為中國奧運跳水史上第一個板台雙冠王。

不過，响伏明霞第一次拎奧運金牌之後，就引起一場小風波。因為美國名將克拉克就向國際泳聯抗議，話同年紀太細嘅選手對賽，對年紀大嘅選手同年紀細嘅參賽者本身都唔公平。所以响個屆奧運之後，國際泳聯就修改咗規則，要求以後參加國際泳聯嘅世界大賽包括奧運跳水賽，選手年齡都唔可以細過14歲。所以，伏明霞亦成為咗最後一位响14歲之前獲得跳水金牌嘅選手喇！